#

नेकपा माओवादी केन्द्रले आफ्नो नेतृत्वमा सहमतीय सरकार गठनका लागि पहल गर्ने गरेको छ । आज बिहान माओवादी अध्यक्ष दाहालको निवास लाजिम्पाटमा बसेको माओवादी केन्द्र सचिवालयको बैठकले पुरानै सहमति अनुसार सरकार गठनका बारेमा पहलकदमी लिएर छलफल गर्ने निर्णय गरेको हो ।

बैठकले सहमतीय सरकार गठनको जिम्मा अध्यक्ष पुष्पकमल दाहाल प्रचण्डलाई दिने निर्णय पनि गरेको छ । बैठकले नौ बुँदे सहमति र भद्र सहमतिको विषयमा एमाले अध्यक्षको हैसियतमा प्रधानमन्त्री केपी ओलीसँग आजै छलफल गर्न अध्यक्ष दाहाललाई जिम्मा दिएको प्रवक्ता पम्फा भुषालले जानकारी दिइन् ।

माओवादी केन्द्रले एमाले–माओवादीबीच भएको भनिएको तीन बुँदै भद्र सहमति अनुरुप सरकारको नेतृत्व माग्ने निर्णय गरेको हो । नौँ बुँदेसँगै एमाले–माओवादीबीच भएको ३ बुँदे भद्र सहमतिको जगमा टेकेर राष्ट्रिय सरकार निर्माण हुनुपर्ने माओवादी अडान छ ।

हिजो बसेको कार्यालय समिति बैठकमा एमाले–माओवादीबीच भएको तीन बुँदे भद्र सहमति कार्यान्वयनका लागि अधिकतम पहल गर्ने विषयमा छलफल भएको थियो । बैठकमा सरकारमा सहभागी नेताहरुले ओली नेतृत्वको सरकारको विकल्पमा बन्ने राजनीतिक समीकरणमा पार्टीले उठाउँदै आएको एजेन्डा सम्बोधन हुने विश्वासको वातावरण पहिले आउनुपर्ने धारणा राखेका छन् ।