कार्तिक १८, २०७३- अख्तियार दुरुपयोग अनुसन्धान आयोगका निलम्बित प्रमुख आयुक्त लोकमानसिंह कार्कीविरुद्ध अदालतमा म्याद तामेलीमा अवरोध गरेको आरोपमा सर्वोच्च अदालतमा मुद्दा दर्ता भएको छ ।


अधिवक्ता ओमप्रकाश अर्यालले कार्कीसहित उनका ज्वार्इं प्रवल थापा लगायत ४ जना र अन्य ‘प्रतिकार समूह’ले म्याद तामेलीमा अवरोध गरेकाले उनीहरुलाई कारवाहीको माग राखी सर्वोच्चमा उजुरीपत्र दर्ता गराएका हुन् ।

म्याद तामेलीमा अवरोध गरे मुलुकी ऐनको अदालतको बन्दोबस्तीसम्बन्धी महल अनुसार १५ दिन कैद, एक हजार रुपैंया जरिवाना वा दुवै सजाय हुने व्यवस्था छ । उजुरीमा कृषि विकास बैंकका अध्यक्ष एवं पूर्व कानून सचिव प्रमोद कार्की र महानगरिय प्रहरी वृत्त बानेश्वरका सई नकुलराज गौतमलाई पनि विपक्षी बनाइएको छ ।