#

अबिरल वर्षाका कारण अहिले देशभरी कै नदीमा पानीको सतह बढिरहेको छ । जल तथा मौसम विज्ञान विभाग अन्तर्गतको बाढी पूर्वानुमान शाखाका अनुसार अहिले ललितपुरको खोकनामा बागमती, झापामा कन्काई र सिन्धुपाल्चोकमा भोटेकोशीमा पानीको सतहले चेतावनी तह पार गरेको छ ।

यस्तै कन्काई, कोशी, बागमती, नारायणी, तिनाउ र कर्णालीमा पनि पानीको सतह बढिरहेको शाखाले जनाएको छ ।
सोमबार दिउँसोदेखि नै पानी परेपछि सेती, कालिगण्डकी, विनय खोला, अरुण खोला र आसपासमा पश्चिम राप्ती, बबई, भेरी, मोहना र आसपासका अरु नदीमा बाढीको सम्भावना बढेकाले नदीको तटीय क्षेत्रमा तथा विशेषगरी तराईका बासिन्दालाई आज दिनभरी नै उच्च सतर्कता अपनाउन शाखाले आग्रह गरेको छ । यस्तै नदी जलाधारका पहाडी क्षेत्रमा तथा भिरालो जमिनमा पहिरोको जोखिम रहेकाले सतर्कता अपनाउन आग्रह गरिएको छ ।

यसैगरी बुटवल १३ देबिनगर र बुद्धनगर जोड्ने झोलुङ्गे पुल तिनाउको बाढीले बगाएको छ । तिनाउको यो पुल बगाएपछि स्थानीयहरु भागाभाग भएका छन् भने नदी बस्तीमा पसेको छ । ११ हजार जना रहेको तिनाउ वरपरको सुकुम्बासी बस्तीभर पुरै सन्त्रास छाएको छ । उद्धारका लागि प्रहरी परिचालन गरिएको छ भने स्थानीयहरु सो स्थान छाडेर भागेका छन् । बुटवलको प्रगतिनगरमा ५ वटा घर बाढिले बगाएको छ ।

उता, कपिलवस्तुको वाणगंगा नदीमा पानीको सतह बढेको छ । नदीमा पानीको सतह बढेपछि वाणगंगा नदी किनारका ब्स्तीहरु उच्च जोखिममा परेका छन् । लक्ष्मणघाट, कोपवा, निग्लिहवा, अकवरपुर, हरदौना, सिहोखोर गाउँ जोखिममा परेका हुन् ।

यसैगरी, स्याङ्जाको कालीगण्डकी ए जलविद्युत परियोजनाको बाँध खोल्दा पर्वतको सेतीवेणी बजार डुबानमा परेको छ । स्याङ्जा, पर्वत र गुल्मीको संगम स्थल सेतीवेणी बजारका १९ घर डुबानमा परेको सेतीवेणी प्रहरी चौकीले जनाएको छ । पर्वतको सेतीखोलालाई कालीगण्डकी नदीको पानीले छेक्दा सेतीवेणीको शिला, शिवमन्दिर लगायतका क्षेत्र डुबानमा परेका हुन् । प्रहरीका अनुसार पर्वत तर्फ रहेको सेतीवेणी उच्च माविसहित अझै ५० घर जोखिममा छन् ।