काठमाडौ, २९ असार । नेकपा माओवादीको नेतृत्वमा नयाँ सरकार गठन गर्ने गरी भएको सात बुँदे सहमति अनुमोदन गराउन बोलाईएको नेपाली काग्रेस केन्द्रीय कार्य समितिको बैठकमा सभापति शेरबहादुर देउवा विरुद्ध नेता रामचन्द्र पौडेलले आक्रोस पोखेका छन ।
माओवादीसँग भएको सात बुँदे सहमतिलाई लिएर पौडेल देउवा विरुद्ध खनिएका हुन ।

बैठकमा पौडेलले भनेका थिए,‘ गिरिजाप्रसाद कोइराला र सुशील कोइरालाले यस्ता महत्वपूर्ण विषयमा पार्टीका प्रमुख नेताहरुसँग कम्तिमा छलफल गर्थे तर तपाईले त कसैसँग छलफल नगरी सात बुँदे सहमति गर्नु भयो । कम्तिमा पदाधिकारीहरुसँग त छलफल गर्नु पर्दथ्यो, शसांकजी विरामी हुनु हुन्छ उहाँसँग पनि छलफल गर्नु भएन, यो के गर्नु भएको ?’

‘कोइरालाले एकलौटी गरेर निरकुंश भए भनेर विरोध गर्ने तपाई नै होईन अहिले तपाईले यो के गरेको ? तपाई त उनीहरु भन्दा पनि निरकुंश हुनु भयो नि ’ भनेर आक्रोस पोखेका थिए ।

उनले सरकार ढाल्ने विषयमा आफुहरुको आपत्ति नभए पनि पार्टी सस्थागत रुपमा चलाउन नसकेको र पार्टीलाई एउटा पद्धति र विधीबाट सञ्चालन नगरेको आरोप लगाएका थिए ।

जवाफमा देउवाले यस्तो कुरा बाहिर आउँदा सहमति हुन नसक्ने स्थिति बन्न सक्ने सम्भावनाका कारणले आफूले गोप्य रुपमा सहमति गरेको स्पष्टीकरण दिएका थिए ।