#

तपाइँलाई पत्यार नलाग्न सक्छ तर कार्यालय समयमा सिंहदरबारभित्रै तासमा रमाउदै  गरेको अवस्थामा राष्ट्र सेवक कर्मचारी भेटिएका छन् । प्रधानमन्त्री तथा मन्त्रिपरिषद्को कार्यालय सिंहदरबारमा बिहीबार कार्यालय समयमै कर्मचारी तास खेल्दा खेल्दै भेटिएका हुन्।

अर्थमन्त्रालयको अगाडि अनुगमनतथा मूल्याङ्कन महा शाखाको सूचना अधिकारी कक्षसँगै रहेको कमर्मचारी आराम गर्ने कक्षमा कर्मचारी तास खेल्दै गरेको अवस्थामा भेटिएका हुन् ।
कर्मचारीले तास खेलि राख्दा दर्शक भनेका प्रहरी समेत देखिए ।

तस्बिर र भिडियो खिच्न सुरुगरेपछि एक कर्मचारीले भने, ‘खिचेर केही हुँदैन खिच खिच, अस्ती पनि खिचेको हो, के भयो र’ एक कर्मचारी ले यसरी बोले पनि भिडियो कैद भएपछि कर्मचारी तास खेल्न छोडेर सूचना अधिकारीको कक्षबाट बाहिरिए ।

भिडियोः



प्रचण्डलाई झट्का

प्रधानमन्त्री कार्यालयमा देखिएको यो दृष्यले छोटो समयमा केही काम गरेर देखाउने प्रण गरेका प्रधानमन्त्री पुष्पकमल दाहाल प्रचण्डलाई भने ठूलो झट्का लागेको छ । प्रधानमन्त्री हुने वित्तिकै प्रचण्डले प्रधानमन्त्री कार्यालय मातहतका कर्मचारीहरुको सामूहिक बैठक गरी सरकारको गोल पुरा गर्ने गरी काम गर्न निर्देशन दिएका थिए ।

सिंहदरबारमा आयोजित बैठकमा प्रधानमन्त्री प्रचण्डले भनेका थिए, ‘सचिवस्तरीय बैठकमा मैले सरकारको प्राथमिकता र योजनाबारे निर्देशित गरेको छु, त्यहीँअनुसार परिणाम निकाल्ने गरी काम गर्नुहोला ।’

प्रधानमन्त्रीले समय थोरै र काम धेरै भएकाले युद्धस्तरमा काम गर्न कर्मचारीहरुलाई निर्देशित गरेका थिए । प्रधानमन्त्रीले भनेका थिए, ‘संविधान संशोधन गर्नुछ, कार्यान्वयन गर्नुछ, पूनर्निर्माण र नवनिर्माणलाई प्रभावकारी बनाउनुछ, समृद्धि र सुशासन स्थापित गर्नुछ, २०७४ माघ ७ भित्र सबै तहका निर्वाचन सम्पन्न गर्नुछ । तसर्थ, परिणाममूखी काम गर्नुहोला ।’

प्रधानमन्त्रीले निर्देशन दिएको १५ दिन नवित्दै कर्मचारीले प्रधानमन्त्री कार्यालयमा देखाएको हर्कतले कर्मचारी तन्त्रमा रहेको गैरजिम्मेवारीलाई उदाङ्गो पारेको छ ।