#

लामो बहस र विवादपछि नेकपा माओवादी केन्द्रले आफ्नो भागमा परेका मन्त्रीहरुको टुंगो त लगायो तर एक मन्त्रीले भने अझै जिम्मेबारी पाउन सकेका छैनन् । शिक्षा मन्त्री बन्ने चर्चामा रहेका डी आर (धनिराम) पौडेलले अन्ततः विनाविभागीय मन्त्रीको रुपमा सपथ लिए ।

पार्टीका शीर्ष नेताको भागवण्डामा मन्त्री बनाउने क्रममा नेता नारायणकाजी श्रेष्ठको सिफारिसमा पौडेलले मन्त्री बन्ने अवसर पाएका हुन् । तर उनले मन्त्रालयको जिम्मेबारी अझै पाउन सकेका छैनन् त्यो पनि जसले सिफारिस गर्यो उसैको कारण । पहिलाका मन्त्री नदोहोर्याउने मापदण्ड बनाइएकाले गिरिराजमणी पोख्रेल नपरेपछि श्रेष्ठले डिआरलाई रोजेका हुन् ।

किन पाएनन् जिम्मेबारी ?
मन्त्री छान्नका लागि माओवादी हेडक्वाटरको बैठक विहानैदेखि बसिरहेको थियो । बैठकमा पौडेल मन्त्री बन्ने कुरो पनि मिल्यो तर मन्त्रालय मिलेन । माओवादी भित्र पनि नारायणकाजी श्रेष्ठ पक्षीय नेताले शिक्षा मन्त्रालय पाउनुपर्ने अडान लिए ।

बैठकमा बोल्दै श्रेष्ठले पौडेललाई शिक्षा मन्त्री बनाउनुपर्ने अडान लिएपछि पार्टी अध्यक्ष एवं प्रधानमन्त्री पुष्पकमल दाहाल प्रचण्डले शिक्षा मन्त्री काँग्रेसलाई दिने सहमति भइसकेको भन्दै स्वास्थ्य मन्त्री बनाउने प्रस्ताव गरे । तर श्रेष्ठले मानेन्, स्रोतले भन्यो, त्यसपछि पार्टी अध्यक्ष एवं प्रधानमन्त्रीलाइ तत्काल काँग्रेस सँग परामर्श गर्न उनले आग्रह गरे ।

बैठक चल्दै गर्दा प्रचण्डले सत्ताको प्रमुख साझेदार नेपाली काँग्रेसका सभापति शेरबहादुर देउवालाई टेलिफोन गरे तर ग्रीन सिग्नल नपाएपछि प्रचण्डले काँग्रेसले नमानेको जानकारी बैठकमा गराए । त्यसपछि श्रेष्ठले मध्यमार्गी बाटो खोज्दै भने, अहिले विनाविभागीय मन्त्री बनाउँ म काँग्रेससँग कुरा मिलाउँछु अनि जिम्मेबारी दिउँला । त्यसपछि पौडेलले विनाविभागीय मन्त्रीका रुपमा सपथ लिएको स्रोतले दाबी गरेको छ ।


शिक्षामा किन मरिहत्ते ?
नारायणकाजी श्रेष्ठ समूहबाट माओवादी सरकारमा छँदा गिरिराजमणी पोखरेल एक पटक शिक्षा र एक पटक स्वास्थ्य मन्त्री भइसकेका छन् ।

स्वास्थ्य मन्त्रालय पनि सम्हालिसकेको यो समूहले फेरि स्वास्थ्य मन्त्री पाउँदा किन शिक्षा नै चाहिन्छ भन्दै मरिहत्ते गरे ? दुबै मन्त्रालयको स्वाद चाखिसकेको यो समूहले शिक्षालाई मालदार मन्त्रालय सम्झिएको छ । त्यसमाथि विभिन्न आइएनजिओको ३४ करोडको बजेट शिक्षामा आउन लागेको चाल पाएपछि श्रेष्ठले शिक्षा मन्त्रालय पाउनुपर्ने अडान नछोडेको स्रोतको दाबी छ ।