#

सरकारले तराई मधेश आन्दोलनका क्रममा घाइते भएकाहरुको उपचार, राहत र थुनामा परेकाहरुलाई रिहाई गर्ने भएको छ ।सिहदरबारमा शुक्रबार भएको सरकार र संघीय गठबन्धनबीचको वार्तामा यस्तो सहमति भएको हो।

आज बिहान करिब डेढ घण्टा प्रधानमन्त्री प्रचण्डले मधेसी मोर्चा आवद्ध दलका अध्यक्षहरुसँग वार्ता गरेका हुन् । वार्तामा सरकारको प्रमुख घटक कांग्रेस सभापति शेरबहादुर देउवा पनि उपस्थित थिए ।

प्रचण्ड प्रधानमन्त्री हुनुअघि सत्ता गठबन्धन नेपाली कांग्रेस र माओवादी केन्द्रसँग गठबन्धनले तीन बुँदे सहमति गरेको थियो। सहमति बुँदा नम्बर दुईलाई आजैको क्याबिनेटबाट निर्णय गराउने सहमति भएको वार्तामा सहभागी फोरम नेपालका अध्यक्ष उपेन्द्र यादवले जानकारी दिए ।

आन्दोलनका क्रममा तराई मधेसमा भएका हिंसा, हत्या, आगजनी, तोडफोड लगायतका घटनाहरुबारे सत्यतथ्य छानविन गरी प्रतिवेदन पेश गर्ने सहमति पनि भएको थियो । यी कुराहरु पनि क्रमिकरुपले गर्दै जाने सहमति भएको उनले जानकारी दिए ।

आन्दोलनबारे छानबिन र संविधान संसोधन प्रक्रियामा धेरै दिन लाग्ने भएकाले आन्तरिकरुपमा यसको समाधान खोज्ने दुई पक्षबीच सहमति भएको यादवलको भनाई छ ।

सहमतिसँगै मोर्चाका कतिपय नेताहरु सरकारमा जाने विषयमा सकारात्मक देखिएको बुझिएको छ । मधेशी मोर्चाका नेताहरुलाई सरकारमा ल्याउन सके प्रधानमन्त्री प्रचण्डका लागि ठूलो सफलता मिल्ने विश्लेषकहरुले बताएका छन् ।