#

क्यानडा, १३ भदौ –खबर क्यानडाको मानितोबा प्रान्तको हो । दुई मिलनसार साथीहरूले आफूहरू बाल्यकालमा अस्पतालबाटै एक अर्काको परिवारमा साटिएको थाहा पाएका छन् । डेभिड ट्रेट र लिओन स्वान्सन दुवै ४१ वर्षका रुन थाले जब उनीहरूलाई पत्रकार सम्मेलनमार्फत यो खबर बताइयो । डेभिडले रुँदै भने कि उनीहरू यस विषयमा प्रष्ट उत्तर चाहन्छन् ।

उनीहरू दुई जनालाई नर्वे हाउस हस्पिटलमा सन् १९७५ मा एक अर्काका परिवारलाई झुक्किएर बुझाइएको थियो । यो अस्पताल पश्चिम क्यानडाको मानितोबा प्रान्तमा नै पर्दछ । ४१ वर्षपछि डिएनए परीक्षणबाट उनीहरू एक अर्काका परिवारबाट साटिएको पत्ता लागेको थियो । यी दुई व्यक्तिहरू मानितोबाको क्रि नेसन नामक उपत्यकामा बस्ने गर्दछन् , जहाँ ५ हजार व्यक्तिहरूको बसोबास छ , यसमध्ये धेरैजसो जनजातिहरू हुन् । टे«ेटले समाचार थाहा पाएर आफू ‘व्याकुल, व्यग्र र दुखी’ भएको बताए ।

‘मलाई उत्तर चाहिएको छ किन हामीमाथि यत्रो अन्याय भयो ? हामीलाई यस घट्नाले अनेक कोणबाट विचलित बनाउनेछ । यो अत्यन्त कष्टप्रद जीवन हुनेछ , ’ ट्रेटले भने, ‘जसले मलाई हुर्काए , उनीहरू नै मेरा बाआमा हुनेछन् ।’ तर उनले दुखी हुँदै भनेकी – अब त अर्कै बाआमा र दाइ हुनेछन् । गत नोभेम्बर महिनामा मानितोबा सरकारले भनेको थियो कि ‘यही अस्पतालबाट दुई व्यक्तिहरू जो निकट साथीका रूपमा छन् , उनीहरू पनि अस्पतालबाट साटिएका छन् ।’ यसअघि ल्युक मोनिआस र नोर्मान बार्कम्यान्स् नामक व्यक्तिहरूको पनि यस्तै घटना भएको पत्ता लागेको थियो ।

उक्त घटनाले प्रेरित भएर ट्रेट र स्वान्सनले पनि शंका लागेर डिएनए परीक्षण गराएका थिए । डिएनए टेस्टबाट ट्रेट र स्वान्सनको परिवार साटिएको प्रष्ट भएको छ । सांसद एरिक रोबिन्सनले यी दुई व्यक्तिमाथि अस्पतालबाट गम्भीर अपराध गरिएको बताए । उनले भने,‘ यी दुईमाथि भएको अन्यायको राज्य सरकारले क्षतिपुर्ति दिनुपर्छ । यो अपराध हो । एउटा मात्रै अपराध भए पो, यहाँ त दुई दुईवटा अपराध गरियो ।

’ क्यानेडियन स्वास्थ्यमन्त्री जेन फिल्पटले उस्तै प्रकारको यो दोस्रो घटनाले आफूलाई अत्यन्त मर्माहत बनाएको बताइन् । उनले भनिन् , ‘यस घटनाबाट क्यानडा सरकारले जनजातिहरुलाई झनै उच्चस्तरको स्वास्थ्यसेवामा जोड दिनु पर्ने कुरा प्रष्ट भएको छ।’