#

पोल्याण्डको राजधानी वार्सास्थित भारतीय दुताबासले नेपालीहरुसँग क्षमा मागेको छ ।
दुताबास परिसरमा राखिएको भारतीय पर्यटन विज्ञापनमा नेपालको तस्विर राखेर झुक्क्याइएको भन्दै नेपालीहरुले आवाज उठाएपछि दुताबासले गल्ती स्वीकार गर्दै क्षमा याचना गरेको हो ।

यो विषयमा नेपालका राजेश श्रेष्ठले पहिलो पटक सामाजिक सञ्जालमा कुरा उठाएका थिए ।
उनको अभियानलाई धेरै नेपालीहरुले साथ दिएपछि भारतीय दुताबासले क्षमा याचना गर्दै उक्त पोष्टर हटाइएको जानकारी दिएको हो ।

वार्सास्थित भारतीय दुतबास बाहिर राखिएको पोष्टरमा नेपालको अन्नापूर्ण हिमाल रेञ्जमा एक युवतीले योग गरिरहेको तस्विरलाई भारतकै हिमालकोरुपमा देखाइएको थियो ।

राजेश श्रेष्ठले राखेको फेसबुक पोष्ट ७०० पटक शेयर भएको थियो भने नेपालीहरुले भारतीय दुतबासलाई गाली गरेर पोष्टहरु शेयर गरेका थिए ।

ब्यापक विरोध र आलोचना पछि वार्सास्थित भारतीय राजदुत अज बिसारिओनले ट्वीटरमार्फत स्पष्टिकरण दिँदै गल्तिले उक्त तस्विर प्रयोग भएको र आउट सोर्सिङ गर्ने कम्पनीले दिएको तस्विर भएका कारण गल्ती भएको बताएका थिए । उनले राजेशको फेसबुकमा पनि यो गल्ती औंल्याइदिएकोमा धन्यवाद दिँदै क्षमायाचना गरेका छन् ।





यसैबीच भारतीय दुताबासले दुरुपयोग गरेको नेपालको अन्नापूर्ण हिमाल रेञ्जको तस्विर एक भुटानी साइटले पनि दुरुपयोग गरेको पत्ता लागेको छ । भुटान ओरियन्ट एक्पेडिसन भन्ने ट्राभल साइटमा नेपालको तस्विर राखेर भुटानकोरुपमा चिनाइएको छ ।
भुटान योगा इन द हिमालया भन्ने शीर्षकको क्याप्सनमा सोही तस्विर प्रयोग भएको देखिन्छ ।