#

काठमाडौं, ११ भाद्र । भारतको डिजाइनमा प्रचण्ड नेतृत्वको सरकार बनेको भनेर लगाइएको आरोपलाई पुष्टी गर्ने गरी प्रचण्डले भारतसँग ४ बुँदे भित्री सम्झौता गरेर आत्मसमर्पण गरेको रहस्य खुलासा भएको छ । आफ्ना विशेष दूत उपप्रधानमन्त्री विलेनेन्द्र निधिलाई भारत पठाएर प्रधानमन्त्री बनेका प्रचण्डले यस्तो गोप्य आत्मसमर्पणवादी सम्झौता गरेको खुलासा भएको छ ।

भारतबाट प्रकाशित अंग्रेजी दैनिक पत्रिका हिन्दुस्तान टाइम्सले यस्तो खुलासा गरेको हो । हालै अगस्त २० को हिन्दुस्तान टाइम्समा प्रकाशित समाचारअनुसार प्रचण्डले भारतका प्रधानमन्त्री नरेन्द्र मोदीसँग मुख्यत चार बुँदामा सम्झौता गर्न पुगेका छन् ।


ती सम्झौता यस्ता छन्  :

पहिलो, विगतमा भएका कमजोरीप्रति माफी मागिएको र अब त्यस्तो गल्ती नगर्ने ।
दोस्रो, ती गरिएका गल्तीलाई सच्चाएर भारतसँग मिलेर अघि बढ्ने ।
तेस्रो, भारतले भनेअनुसार नै संविधान संशोधन गर्ने र
चौथो, नेपालको विकासमा भारतले सघाउनु पर्ने ।

भारतीय अंग्रेजी दैनिक हिन्दुस्तान टाइम्सकाअनुसार विगतमा खासगरी संविधान घोषणा गर्ने क्रममा भारतले आफुले चाहेअनुरुप संविधान नबनाएको भन्दै नेपालका दलहरुप्रति चरम असन्तुष्टी व्यक्त गरेको थियो ।

संविधान घोषणापूर्व नेपालका ठूलो दलका ठूला नेताहरुलाई भारतमै बोलाएर नरेन्द्र मोदीले नेपालको संविधान निर्माण हुँदा नेपाललाई हिन्दु राष्ट्र घोषणा गर्नु पर्ने, राजतन्त्रलाई कही न कही स्थान दिनु पर्नेलगायतका विषयमा निर्देशन दिएका दिए ।

सबै ठूला दलका नेताले मौखिक सहमति जनाएका थिए । त्यो बेला तत्कालीन एमाओवादीबाट प्रचण्ड, कांग्रेसबाट शेरबहादर देउवा र एमालेबाट विद्यादेवी भण्डारीलगायत मधेशवादी दलका सबै नेताहरुलाई भारतमा बोलाएर नेपालमा आफ्नो अनुकूल संविधान बनाउनु पर्नेमा भारतले जोड गरेको थियो ।

तर त्यो हुन सकेन । आफुले भनेअनुसार नभएपछि भारत नेपालप्रति र त्यसमा पनि विशेष गरी प्रचण्डसँग रिसाएको थियो । हो त्यही विगतमा भएको कमजोरीलाई लिएर भारत रिसाएको भन्दै प्रचण्डले मोदीसँग आफुले गल्ती गरेको भन्दै माफी मागेको बुझिएको छ ।

दोस्रो कुरा विगतमा जे गल्ती भएपनि अब विगतका कमजोरी सच्चाउदै अगाडि बढ्ने कुरा प्रचण्डले मोदीसँग आफ्नो विशेष दूतमार्फत राखेका छन् ।

तेस्रो भारतले भन्दै आएको विद्यमान संविधानमा संशोधन गर्दै मधेशवादी दलहरुलाई समेटेर लैजान आफु संविधान संशोधन गर्न तयार रहेको कुरा प्रचण्ड भारतसँग सहमत भएका छन् ।

चौथो कुरा प्रचण्डले अबको विकास चीन होइन भारत नै अगाडि आउनुपर्छ र नेपालको समग्र विकासमा भारतले सघाउनु पर्छ भन्दै भारतसँग आग्रह गरेको बुझिएको छ ।

विश्लेषकहरु भन्छन्, प्रचण्डको राजनीतिक इतिहास भारतबाट बनेको र भारतकै कारण अहिले प्रधानमन्त्री बनेका कारण यो प्रचण्ड नेतृत्वको सरकारबाट देशमा निकै ठूलो स्तरमा राष्ट्रघात हुने छ ।