#

अहिलेको फुटबल दुनियाँमा दुई जना सुपरस्टार कोही दुई जनाको नाम लिंदा आउँछ अर्जेन्टिनाका लियोनेल मेसी र पोर्चुगलका क्रिश्चियानो रोनाल्डो । अर्जेन्टिनामा हुँदा १० वर्ष पनि उमेर नपुगेका मेसी उपचार गर्न समस्यामा परेपछि उनको फुटबल कलालाई हेर्दै बार्सिलोनाले लग्यो, उपचार गरायो । र, २०००४ देखि अहिलेसम्म तिनै मेसीले स्पेनको बार्सिलोनालाई जिताउन बाँकी उपाधि केही छैन । उनले व्यक्तिगत रुपमा जित्न बाँकी उपाधि पनि केही छैन । तर, राष्ट्रिय टोलीबाट मेसीलाई सम्झँनुपर्दा उनको भागमा उही आँसुमात्र पर्न जान्छ!

उपाधि नै जित्न उनको टोलीले सकेको छैन । क्लब फुटबलमा गरेको योगदान र मैदानमा खेलेको गरेको सनसनीपूर्ण प्रदर्शनीबाट उनले विश्वलाई चकित पार्दै आएका छन् । तर, तिनै मेसीलाई राष्ट्रिय टिममा प्रभावकारी भूमिका नखेलेको उपाधि नजिताएको आरोप लाग्न छोडेन । आरापलाई खेप्दै उनले आफ्नो राष्ट्रिय टोलीलाई उपाधिसम्म नपुर्याएका होइनन् । तर, विश्वकप फुटबलमा फाइनलमा जर्मनीसँग १–० को पराजयले सुपरस्टार मेसी ठूला प्रतियोगिताबाट विमुख हुन पुगे ।

क्षेत्रीय स्तरको कोपा अमेरिकामा मेसीको टोली अर्जेन्टिना गत वर्ष फाइनलमा पुग्यो । मेसी प्रेरित अर्जेन्टिना फाइनलमा चिलीबाट पेनाल्टी सुटआउटमा पराजित हुन पुग्यो । त्यही चिलीसँग यसवर्ष मेसीको टिमलाई बदलाको स्वर्णिम अवसर पनि थियो । मेसीको प्रेरणामा अर्जेन्टिना सानदार रुपले फाइनलमा पनि पुग्यो । तर, नतिजा उस्तै मात्रै रहेन । मेसी पेनाल्टी सुटआउटमा चुक्दा कोपा अमेरिकाको फाइनल जित्ने मेसीको धोको पूरा हुन पाएन । उनी विक्षिप्त बने । विश्वफुटबलमा सुपरस्टारको छवि बनाएका मेसीका लागि लगातारको हार यत्ति पीडादायी बन्यो की उनले राष्ट्रिय टोलीबाट नखेल्ने घोषणा गर्न पुगे । एउटा फुटबल स्टारको लागि राष्ट्रलाई उपलब्धी दिलाउन नसक्नु उनका लागि पीडा बन्न पुग्यो ।

अहिले युरोकपमा अर्का सुपरस्टार क्रिश्चियानो रोनाल्डो पनि महत्वपूर्ण अवस्थामा छन् । आज युरोकपको फाइनल हुँदैछ । यस्तै मेसी जत्तिकै सुपरस्टार रोनाल्डोलाई राष्ट्रका लागि उपाधि जिताउने स्वर्णिम अवसर छ । उनले पनि मेसी जस्तै व्यक्तिगत रुपमा जित्न बाँकी क्लब फुटबलबाट केही छैन । तर, उनका लागि पनि मेसीको भन्दा कम पीडादायी क्षण गुज्रेको छैन । सन् २००४ मा आफ्नै देशमा भएको युरोकपमा फाइनलमा रोनाल्डोको पोर्चुगल ग्रीससँग १–० हार्दै उपाधि खोसिएको पीडा बेहोर्न बाध्य भएको थियो ।

 तिनै रोनाल्डोसामू आज राती १२ बजेर ४५ मिनेटमा हुने खेलमा फ्रान्सविरुद्ध जितेर राष्ट्रिय टिमका लागि ठूलो उपाधि जिताएर आफूलाई ऐतिहासिक बनाउने अवसर पनि रोनाल्डोका सामू छ । समूह चरणमा बराबरी नतिजा हात पारे पनि नक आउट चरणदेखि पोर्चुगलले लय समातेको थियो । पछिल्ला १० भिडन्तमा पोर्चुगल फ्रान्सविरुद्ध जितेको छैन । तर, सुपरस्टार रोनाल्डो मैदानमा चल्दा यो इतिहास मेटिन सक्छ । र, उनी मेसी जस्तै अभागीबाट भाग्यमानी हुँदै देशका लागि उपाधि जिताउन उनले सक्छन् ।

जसरी मेसी लगातार तीनवटा फुटबल प्रतियोगिताको फाइनलमा स्तब्ध हुँदै मैदानमा आँसु चुहाउँदै बिदा हुन बाध्य भए तर, अर्का सुपरस्टार रोनाल्डोको लागि भने त्यस्तो नहुन आजको खेल जित्नैपर्ने हुन्छ । एउटा सुपरस्टारका लागि फाइनलमा हार बेहोर्दै उपाधि अर्को टिमलाई सुम्पनुजतिको पीडा अर्को के होला ?