#

बझाङ,१४साउन । नेकपा एमालेको छैठौँ महाअधिवेशनमा विभाजित भएदेखि बझाङमा छुट्टै दलको अस्तित्वमा रहेको नेकपा मालेको सम्पूर्ण जिल्ला कमिटी नेकपा एमालेमा समाहित भएको छ । अर्को दल राष्ट्रिय जनमोर्चाका अध्यक्षसहित जिल्ला कमिटिका अधिकांश पदाधिकारी पनि एमालेमा प्रवेश गरेका छन् ।

पूर्व वन मन्त्री भानुभक्त जोशीको हातबाट टिका लगाएर नेकपा मालेका केन्द्रिय सदस्य धर्मराज रसाइलीसहित सम्पूर्ण जिल्ला कमिटिका पदाधिकारी तथा १ सय ३८ जना संगठित सदस्यहरु एमालेमा प्रवेश गरेका हुन् । यस्तै राष्ट्रिय जनमोर्चा नेपालका जिल्ला अध्यक्ष र केही जिल्ला कमिटी सदस् सहित ३१ जना एमालेमा प्रवेश गरेका छन् ।

नेकपा एमालेका जिल्ला अध्यक्ष दिलबहादुर सिंहले नवप्रवेशीलाई खादा ओडाएर स्वागत गरेका थिए । अबको आर्थिक विकासको लागि बामपन्थीको एकता अपरिहार्य रहेको र यसका लागि एमाले पार्टीले लिएको सिद्धान्त र विचार उपयुक्त भएकोले आफूहरु सम्पूर्ण जिल्ला कमिटि र संगठित सदस्यसहित एमालेमा समाहित भएको मालेका तत्कालिन केन्द्रिय सदस्य धर्मराज रसाइलीले बताए ।

अबको राष्ट्रिय विकासको नेतृत्व एमालेले मात्रै गर्न सक्ने र आफूलाई नीति सिद्धान्त मन परेका कारण जनमोर्चा परित्याग गरि एमालेमा प्रवेश गरेको राष्ट्रिय जनमोर्चाका अध्यक्ष धिरबहादुर थापाले बताए ।

स्पष्ट विचार र कार्यशैलीका कारण एमाले प्रति अन्य पार्टीका समर्थकहरुको आर्कषण बढ्दै गएकोले भविष्यमा धेरै व्यक्तिहरु पार्टी प्रवेशको तयारी गरिरहेको पूर्व वन मन्त्री एवं एमालेका पूर्व केन्द्रिय सदस्य भानुभक्त जोशीले बताए। उनले आगामी निर्वाचनमा एमाले प्रमुख शक्तिका रुपमा स्थापना हुने दावी समेत गरे ।

शुक्रबारै बसेको जिल्ला कमिटिको बैठकले मालेबाट प्रवेश गरेका रामप्रशाद जोशी र राष्ट्रिय जनमोर्चाबाट प्रवेश गरेका धिरवहादुर थापालाई जिल्ला कमिटि सचिवालय सदस्यमा समेत मनोनित गरेको एमाले निकट श्रोतले बताएको छ ।